Duhok Universities have met at UoD

ل رۆژا 1/8/2017 سەرۆكێن هەر شەش زانكۆیێن پارێزگەها دهۆكێ‌ (دهۆك, زاخۆ، نەورۆز، ئەمریكی ل كوردستانێ‌، جیهان، پولیتەكنیكی دهۆكێ‌) كۆمبوونەك ل سەرۆكاتیا زانكۆیا دهۆك ل دۆر ریفراندۆمێ‌ ئەنجام دان و تێدا چەند بابەت هاتنە بەحس كرن. 

د ڤێ‌ كۆمبوونێ‌ دا سەرۆكێن زانكۆیان گەهشتنە هندەك ئەنجامان ئەو ژی پشتەڤانی ل ئەنجام دانا ریفراندۆمێ‌ بهێتە كرن وەكو بابەتەكێ‌ نەتەوەی و دویر ژ حزباتیێ‌ چونكو یا گرێدایی پاشەرۆژا خەلكێ‌ كوردستانێ‌ یە، هەروەسا بریار دان لژنەكا هەڤپشك د ناڤبەرا ڤان زانكۆیان دا بهێتە پێكئینان بۆ هشیار كرنا خەلكی ل سەر ئەنجامدانا ریفراندۆمێ‌. 

هەر د كۆمبوونێ‌ دا بریار دان د بن ڤێ‌ لژنا هەڤپشك دا لژنێن لایەكی هەبن بۆ دویفچوونا سەكتەرێن جودا یێن گرێدایی  ژیانا خەلكی و دیاركرنا راستیێن بابەتی و پتر هاندانا خەلكی بۆ پشكداری كرن د ریفراندومێ‌ دا، هەروەسا لژنا هەڤپشك ئەو كارێ‌ ئەنجام ددەت پشتبەستێ‌ دێ‌ ل سەر ڤەكۆلین و كارێ‌ ئەكادیمی كەت و پتر چیتە دناڤ جڤاكی دا بۆ هاندانا خەلكی بۆ پشكداری كرنێ‌ د ریفراندۆمێ‌ دا، زێدەباری ئەو كارێ‌ لژنێن زانكۆیان دكەن دێ‌ ل سەر چەند ئاستان بیت و هەر تەخەكی دێ‌ ل دویف ئاستێ‌ وێ‌ تەخێ‌ سەرەدەری دگەل هێتە كرن. 

ئەو ژی هاتە دیاركرن كو رەنگە خەلكەكی مەترسی بۆ پەیدا ببیت ژبەر كو ئەگەر د قەیرانێ‌ دا قەیرانەكا دارایی یا مەزنتر پەیدا ببیت، ئەڤ لژنە ب رێكا شارەزا و بسپورێن ئابووری راستیا ڤی بابەتی بۆ خەلكی دیار بكەن كو چ مەترسی ژ ئەنجامدانا ریفراندۆمێ‌ پەیدا نابن، بەلكو دێ‌ بیتە ئەگەر كو ئەم سەربەخۆیا خۆ وەربگرین و ئەڤ قەیرانا هەی ژی نامینیت. 

هەروەسا ئەڤ لژنا دهێتە پێكئینان دێ‌ هەماهەنگی ل گەل دەزگەهێن راگەهاندنێ‌ هەبیت بۆ پەیدا كرنا بسپورێن تایبەتمەند د هەر بیاڤەكی دا (ئابووری، سیاسی، جڤاكی و .... هتد) داكو پشكداریێ‌ د بەرنامە و شرۆڤێن وان دەزگەهان دا بكەن، هەروەسا دێ‌ هەماهەنگی ل گەل لژنا بلندا ریفراندومێ‌ ل هەرێمێ‌ هەبیت، داكو ئەو پەیاما ل هەرێمێ‌ دهێتە بەلاڤ كرن ل دۆر ریفراندۆمێ‌ ئێك پەیام بیت و یا پالدەر بیت بۆ پتر پشكداری كرنا خەلكی. 

بریار ژی هاتە دان كۆمبوونێن سەرۆكێن ڤان زانكۆیان د بەردەوام بن هەتا لژنا هەڤپشك دەست ب كارێن خۆ دكەت و دكەڤنە سەر رێكا كاری.