College of Agriculture 2nd conference

ب چاڤدێریا سەرۆكێ‌ زانكۆیا دهۆك پرۆفیسۆر د. مسلح دهۆكی و ب ئامادەبونا د. كەریم عەبدول نوونەرێ‌ وەزیرێ‌ خواندنا بلند و ڤەكۆلینێن زانستی و هاریكارێن سەرۆكێ‌ زانكۆیا دهۆك و راگرێن كۆلیژا و ماموستا و پسپۆر و ڤەكولەرێن چاندنێ‌ یێن بیانی و نافخوی كونفرانسێ‌ نێڤدەولەتی یی چاندنێ‌ یێ‌ دووێ‌ یێ‌ كۆلیژا چاندنێ‌ ل روژا 26/4/2016 ل هۆلا كۆنفرانسان هاتە گێران. 

راگرێ‌ كۆلیژا چاندنێ‌ د. محەمەد ئەمین یاسین ل رێورەسمێن ڤەكرنا كۆنفرانسی دیاركر كو بەرهەڤبوونا هژمارەكا مەزن یا ڤەكولەر و شارەزایێن بەرچاڤ دبیاڤێ‌ چاندنێ‌ دا ل كونفرانسێ‌ زانستی یێ‌ چاندنێ‌ یێ‌ دووێ‌ جهێ‌ سەرفەرازیێ یە، و ئەڤ جڤینا ئەكادمی بۆ بسپوران ئاسویەكێ‌ گەشە و بنیاتێ‌ پەیوەندی كرنێ‌ و هەڤكاریا زانستی پەیدا دكەت. 

د. محەمد ئەمین یاسین گوت گێرانا كونفرانسەكێ‌ ب ڤی ئاوای د رەوشەكا وەكی ئەڤرۆ یا هەریما كوردستان تێدا د بوریت كو ئەم د كومەكا قەیرانان دا دەربازدبین بخو هەلگرا پەیامەكا مرۆڤایەتیا مەزنە، پەیامەكە بۆ دوژمنێن مللەتی كورد كو هەرچەندە بتنێ‌ بو چەند كێلو مەتران دیر ژ هولێن كونفرانسی پێشمەرگێ‌ قەهرەمان یێ‌ شەرێ‌ درندەترین تیرورستا دكەت و پاراستنا ئاخا وەلاتی و بنەمایێن مرڤایەتیێ‌ دكەت هەڤدەم پروسێسا زانستی نەراوستایە.

سەرۆكێ‌ زانكۆیا دهۆك پرۆفیسۆر د. مسلح دهۆكی د پەیڤەكی دا گۆت ئەڤرۆ و لگور ئەو رەوشا نوكە ب سەر هەرێما كوردستانێ‌ دا هاتی دبیاڤێ‌ ئابوری و دارایێ‌ دا، رۆلێ‌ زانكۆیا دیار دبیت بۆ پەیداكرنا رێكێن شینكر و داهێنانێ‌، رۆلێ‌ زانكۆیا دیاردبیت بۆ پركرنا ڤالاتییا دبیاڤین جودا دا و ئەو بابەت و بیاڤێ‌ هەرێ‌ گرنگ چاوانیا بهێزكرنا كەرتێن دی یێن هەریما كوردستانێ‌ یا پێ‌ ناڤدار و كەرتێ‌ چاندنێ‌ ئێك ژوان كەرتێن سەرەكی یە پێتڤی ب پشتەڤانی و كونفرانسێن سالانە و بەردەوامە. 

پرۆفیسۆر د. مسلح دهۆكی هەروەسا گۆت دڤێ‌ رەوشا نوكە یا هەرێما كوردستانێ‌ ئەوا كارتێكرنەكا مەزن ل هەمی بیاڤا كری و زانكۆ و كۆلیژا چاندنێ‌ رابیت ب ئەنجامدانا ڤی كونفرانسی ب ڤی شێوازێ‌ زانستی و بەشداریا چەندین خودان شیان و تایبەت مەندان، وێ‌ چەندێ‌ ددەتە دیاركرن پێتڤیا كاركرن ب شێوازێن زانستی بۆ بهێزكرن و باشتركرنا بیاڤێ‌ چاندنێ‌ داكو ببیتە ژێدەرەكێ‌ دی یێ‌ دارایێ‌ و هەر وەسا دەرگەهەكێ‌ بیهێزكرنا ئابورێ‌ كوردستانێ‌ بتایبەت پشتی ئەو پێشڤەچوونا كەرتێ‌ پترولێ‌ وەك ژێدەرێ‌ سەرەكی یێ‌ دارایی یێ‌ هەرێمێ‌ و ئەو كاریگەریا راستاخو ل هەمی بیاڤێن ژیانێ‌ كری لەورا بیركرن بۆ بهێزكرنا كەرتێ‌ چاندنێ‌ باشترین رێكە بۆ زامنكرنا ئاسایشا خوراكی كو گرنكیا وێ‌ ب چ رەنگەكی كێمتر نینە ژ ئاسایشا نەتەوەیی، و دهەمان دەمدا هەبوونا ژێرخانا دورست و كادرو و خودان شیان وزەڤی و ئاڤ و رویبار دبیتە فاكتەرەك كو ئەڤ جورە كونفرانسە بێنە ئەنجامدان ب بەردەوامی. 

پرۆفیسۆر د. مسلح دهۆكی دیاركر د پێدا چونەكا وی یا بلەز د ئەوان تەوەرێن سەرەكی یێن كونفرانسی و ژمارا ماموستایێن بەشدار و ئارمانجێن كونفرانسی دبیاڤێن بهێز كرنا بەرهەمێ‌ گیانەوەری و باشتر كرنا ژینگەهێ‌ و ژێدەرێن ئاڤێ‌ وپێداوستیێن چاندنێ‌ یێن پی!شكەفتی، و تەوەرێن دی یێن سەرەكی یێن دێ‌ د كونفرانسی دا هێنە گەنگە شەكرن و ڤەكولین لسەر هێنە پێشكێشكرن نیشانا خەمخوریێ‌ وكاركرنا لژنا بەرهەفكارا كونفرانسی و هەروەسا كۆلیژا چاندنێ‌.

 د. كەریم عەبدول نوونەرێ‌ وەزیرێ‌ خواندنا بلند و ڤەكۆلینێن زانستی د پەیڤەكی دا گۆت گومان د وێ‌ چەندێ‌ دا نینە كو چاندن ژێدەرەكێ‌ هەرە سەرەكی یە بو هەر ولاتەكێ‌ و ئێكە ژ بنەمایێن سەرەكی یێن ئاسایشا نەتەوەی و گرنگی دان ب چاندنێ‌ گرنگی دانە ب ئاسایشا خوارنێ‌ و ئاسایشا نەتەوەی و مە ل كوردستانا عیراقی ئەردەكێ‌ زور و ئاڤەكا پاش و وەرزێن سالی بۆ بەرهەمئینانا كەرەستێن چاندنێ‌ یێن جودا و مەگەلەك بسپورێن چاندنێ‌ یێن باش یێن هەین بەلی مخابن ئەم نە شیانە بەرهەمێن خومالی بگەهینە ئاستێ‌ پێویست ل بازارێن هەرێمێ‌.

د. كەریم عەبدول دیاركر ئەڤ قەیرانا روبەروی هەرێماكوردستان بوی دشیان دا بۆ كاریگەریا وێ‌ سڤكتر با ئەگەر رێژەك لە داهاتی ژ چاندنێ‌ و ل گشتوگوزارێ‌ و بازرگانیێ‌ و ژێدرێن دی یێن داهاتی هاتبا دگەل داهاتیێ‌ نەفتێ‌، نوكەژی مە دەرفەت یا مای نەخشە چارەیەكی ب دانین بو پێشڤەبرنا كەرتێ‌ چاندنێ‌ .